၆၂ မျိုးဆက် (သို့) အမျိုးသားဒီမိုကရေစီ အဖွဲ့ချုပ်၏ မမေ့အပ်သော သူရဲကောင်း ဦးအောင်မေသု”

 စုစည်းတင်ပြသူ-ပျံလွှား

ဦးအောင်မေသု (ခ) ဦးသု (၁၉၄၁ – ၂၀၀၂)
ဥက္ကဌ (သာယာဝတီခရိုင် ကျောင်းသားသမဂ္ဂ)
ဥက္ကဌ (အမျိုးသားဒီမိုကရေစီအဖွဲ့ချုပ်၊ မင်းလှမြို့၊ ပဲခူးတိုင်း)

“အဲဒါပေါ့ဗျ၊ တိုက်လိုက်၊ ရှုံးလိုက်၊ တိုက်လိုက်၊ ရှုံးလိုက်နဲ့ နောက်ဆုံးတော့ ကျွန်တော်တို့ အောင်ပွဲဆင်ရမယ်” ဆိုသည့် မြန်မာ့ ဒီမိုကရေစီအရေး ဘဝပေး လှုပ်ရှားသူ ကိုအောင်မေသု
“ဘာသာရေး လွတ်လပ်စွာ ယုံကြည်ကိုးကွယ်မှုနဲ့ ဘာသာရေး အငြင်းမပွားကြတာ ကောင်းပါတယ်” ဆိုသည့် မြန်မာမွတ်စလင် ကိုအောင်မေသု

ကိုယ်ရေးအကျဉ်း
-မူလတန်းကျောင်းသားဘဝမှစ၍ ဗ.က.သ သို့ဝင်ရောက်ခဲ့သည်။
-၁၉၆၀-၆၂ ခုနှစ်တွင် သာယာဝတီခရိုင် စည်းရုံးရေးမှူး (ရကသ)ညီလာခံကိုယ်စားလှယ်-အုတ်ဖိုမြို့နယ် ဥက္ကဌ တာဝန်များထမ်းဆောင်ခဲ့သည်။
-သာယာဝတီခရိုင် (၈) မြို့နယ် ဥက္ကဌတာဝန်ကိုလည်း ထမ်းဆောင်ခဲ့သည်။
-၁၉၆၃ခုနှစ်ပြည်တွင်းငြိမ်းချမ်းရေးဆန္ဒပြလူထုချီတက်ပွဲတွင် (၄)ခရိုင် ငြိမ်းချမ်းစွာ ဆန္ဒပြပွဲကို ခေါင်းဆောင်ပြီး ရန်ကုန်မြို့၊ ကန်တော်မင်ပန်းခြံသို့ ချီတက်ခဲ့ကြသည်။
-၁၉၆၉၊ဖေဖော်ဝါရီလ ၁၃ရက်နေ့တွင် ကိုကိုးကျွန်းသို့ အပို့ခံရသည်။
- ၁၉၇၁၌ ကိုကိုးကျွန်းတိုက်ပွဲ အောင်မြင်စွာ ပြီးဆုံး၍ အင်းစိန်ထောင်သို့ ပြန်ရောက်ရှိခဲ့သည်။
- ၁၉၇၂၊ဧပြီ ၁၂ရက်နေ့တွင် အကျဉ်းထောင်မှ ပြန်လွတ်မြောက်ပြီး ဒီဇင်ဘာ ၁၈ ရက်နေ့တွင် ဒေါ်ရင်လှနှင့် ထိမ်းမြားခဲ့သည်။
-၁၉၇၆၊ သြဂုတ်တွင် ဒုတိယအကြိမ် ထိန်းသိမ်းခံခဲ့ရသည်။
-၁၉၈၄၊ ဧပြီတွင် တတိယအကြိမ်ထိန်းသိမ်းခံခဲ့ရသည်။
-၁၉၈၈၊ အောက်တိုဘာတွင် အမျိုးသားဒီမိုကရေစီအဖွဲ့ချုပ်သို့ဝင်ရောက်ခဲ့ပြီး ပဲခူးတိုင်း၊ မင်းလှမြို့တွင် ဥက္ကဌတာဝန်ကို ထမ်းဆောင်ခဲ့သည်။
-၁၉၈၉၊ သြဂုတ် ၂၄တွင် စတုတ္ထအကြိမ် ထိန်းသိမ်းခံခဲ့ရပြီး၊ နိုဝင်ဘာ ၆ရက်တွင် ပုဒ်မ(၅) (ည)ဖြင့် အင်းစိန်စစ်ခုံရုံးမှ ထောင်ဒဏ် (၁၀)နှစ်ချမှတ်ခဲ့သည်။
-၁၉၉၉၊နိုဝင်ဘာ ၆ရက်နေ့တွင် (၁၀)နှစ်ပြည့်ခဲ့သော်လည်း ပုဒ်မ(၁၀) (က)ဖြင့် ဆက်လက်ထိန်းသိမ်းခံခဲ့ရသည်။ ၂၀၀၂၊ စက်တင်ဘာ ၁၇ ရက်နေ့တွင် အထိန်းသိမ်းခံဘဝဖြင့်ပင် ကွယ်လွန်သွားခဲ့ပါသည်။
-ကွယ်လွန်ချိန်တွင် အမျိုးသားဒီမိုကရေစီအဖွဲ့ချုပ်မှ ဒေါ်အောင်ဆန်းစုကြည်နှင့် အဖွဲ့ဝင်များ ရေဝေးမွတ်စလင်သုဿန်သို့ လိုက်လံပို့ဆောင်ခဲ့ပါသည်။

ဦးအောင်မေသု (ခ) ဦးသုရဲ့ နောက်ဆုံးခရီးကို အမျိုးသားဒီမိုကရေစီအဖွဲ့ချုပ်မှ ဒေါ်အောင်ဆန်းစုကြည်နှင့် အဖွဲ့ဝင်များ ရေဝေးမွတ်စလင်သုဿန်သို့ လိုက်လံပို့ဆောင်ခဲ့ပါသည်။

ဦးအောင်မေသု ဂုဏ်ပြု ကဗျာများမှ ကောက်နုတ်ချက်များ

“ရဲဘော်နီ အောင်မေသု…သို့
မြန်မာ့အကျဉ်းထောင်သမိုင်းမှာ
ကိုကိုးကျွန်းတိုက်ပွဲဟာ
လွတ်လပ်မှုအတွက်
ဂုဏ်ရောင်အပြောင်ဆုံး
မော်ကွန်းထိုးရမယ့်
အစာငတ်ခံတိုက်ပွဲဘဲ ဒီပွဲမှာမင်းပါတယ်။
မြန်မာ့သမိုင်းမှာ
၈၈ အရေးတော်ပုံဟာ
လွပ်လပ်မှုအတွက်
မော်ကွန်းတင်တဲ့တိုက်ပွဲဘဲ ဒီပွဲမှာမင်းပါတယ်။
မင်းဖြတ်သန်းသော ခရီးလမ်း
သမိုင်းက ပေးသောတာဝန်
မင်း ထမ်းဆောင်နိုင်ခဲ့ပြီပဲ
မင်း…မင်းတာဝန်ကျေပါတယ်ကွာ။
နီရဲသော အောင်မေသု
ကောင်းရာသုဂတိ လားပါစေ။”
(စံဦး (NLD ကျောက်တံခါး)၏ ကိုအောင်မေသု ဈာပနတွင် ရေးဖွဲ့ခဲ့သော ကဗျာမှ ကောက်နုတ်ချက်)

“သာယာဝတီ နရသိန်ကို အရောက်
(၈)တိုက်ရဲ့ ဝင်းတံခါးပေါက်ကနေ
ရဲရဲတောက် ကြိုဆိုနှုတ်ဆက်မှု
ကျွန်တော် အောင်မေသု
ခု မင်းလှ NLD ဥက္ကဌ
အရင်က ကျွန်းထိရောက်
ပြန်လာတဲ့နောက်လည်း
ထောင်ထဲ တဝဲလည်လည် ခဏ ခဏပေါ့
ခုလည်း (၁၀ က)တဲ့
ဘာဆန်းလှမလဲ
ဒီလိုပဲ သေတဲ့အထိ ချရမှာပေါ့ တဲ့
ပြုံးစစနဲ့ မထီတရီ ပြောလိုက်သမျှ
အားရနှစ်ခြိုက်ခြင်းများနဲ့
လေးစားကျေနပ်မိဖြစ်ခဲ့”
“မိန်းမဥာဏ် လူတစ်စုလက်ထဲက
ယောက်ျားအသည်းနဲ့ လူတစ်ယောက်ရဲ့ သမိုင်း
ဘယ်တော့မှ မရိုင်း ဘယ်တေ့ာမှ မရှုံး…”
(ရီနေ၏ ဂုဏ်ပြုကဗျာမှ ကောက်နုတ်ချက်)


“အပွင့်ကြွေတာ
ဓမ္မတာဆိုပေမယ့်
လေရိုင်းကြောင့်ဆိုရင်တော့
ပန်းအတွက်
ရာဇဝင်ရိုင်းလွန်းတယ်”
(ဆိုးဆိုး၏ ဂုဏ်ပြုကဗျာမှ ကောက်နုတ်ချက်)


“၂၅နှစ်တဲ့
သက်တမ်းတစ်ခုလုံး
လူထုထံထိုးအပ်
ထမင်းနဲ့မေတ္တာ
ထမင်းပဲ အငတ်ခံတော့တာ…
ရာဇဝင်မှာ
သူရဲကောင်းပမာ
အခါခါ ကယ်သတဲ့
သူ-
ဗမာ့သမိုင်းမှာ
အခါခါ ကယ်ခဲ့ပြီ။”
(ကေလွန်း၏ ဂုဏ်ပြုကဗျာမှ ကောက်နုတ်ချက်)

မြန်မာ့ဒီမိုကရေစီအရေးအတွက် ဘဝစတေးခဲ့သော ဦးအောင်မေသု၏ ရဲရဲနီသော ဘဝစာမျက်နှာအချို့
“သူသည်ကား ၁၉၆၃ ခုနှစ် ခြောက်ခရိုင် ပြည်တွင်းငြိမ်းချမ်းရေး ဆန္ဒပြပွဲ၊ မင်းလှစစ်ကြောင်းမှ မြို့တော်ခန်းမအထိ ခြေလျင်ခရီးရှည် ချီတက်ဆန္ဒပြပွဲအပြီးတွင် ပုဒ်မ ၅ အထိန်းသိမ်းခံဘဝဖြင့် ကိုကိုးကျွန်းကိုအရောက်၊ ကိုကိုးကျွန်းမှ ကမ္ဘာကျော် ကျွန်းတိုက်ပွဲများပြီးဆုံး၍ အင်းစိန်ပြန်ရောက် ဒူးမထောက်အညံ့မခံသော သူ၏ နရသိန်နေ့ရက်များသည် ရှည်လျားစွ။
မဆလအာဏာရှင်ခေတ်တစ်လျှောက် ပါတီယူနစ်များကို အာခံခဲ့သည့်အတွက် အသက်အန္တရာယ်ကိုပင် ရန်ရှာခံခဲ့ရသည့်ဖြစ်ရပ်များ၊ နဝတလက်ထက် လယ်မြေအိမ်ခြံများကို သိမ်းပိုက်ဖယ်ရှား၍ ကားလမ်းဖောက်ခြင်းကို ကန့်ကွက်ဆန္ဒပြမှုကြောင့် နဝတ၏ လမ်းစီမံကိန်းတစ်ခုလုံး ဖျက်သိမ်းပေးလိုက်ရသည့်အဖြစ်များ၊ သူထောင်ကျစဉ်အတွင်း သူ့အိမ်မှ အမျိုးသားဒီမိုကရေစီအဖွဲ့ချုပ်ဆိုင်းဘုတ်အား ဖြုတ်ပေးရန် ခြိမ်းခြောက်ခဲ့သည်တွင် ထောင်ဝင်စာလာတွေ့သည့် ဇနီးသည်အား “သူတို့အတင်းလာပြီး ဖြုတ်ချရင်တော့ လက်ပိုက်ကြည့်နေ၊ မင်းတို့ သဘောတူညီချက်နဲ့ ဖြုတ်တယ်ဆိုရင် ငါ အိမ်ပြန်လာမှာ မဟုတ်ဘူး”ဟု ဆိုလိုက်သည့်အတွက် သူ့အမျိုးသမီးကလည်း ကျွန်မအမျိုးသား သဘောမတူလို့ မလုပ်နိုင်ဘူးဆိုကာ တင်းခံလိုက်ရာ သူ့အိမ်ရှေ့ရှိ ထိုဆိုင်းဘုတ်လေးသည် ၁၀နှစ်ကျော်ကာလအတွင်း ဆေးသားမှေးမှိန်၍ ဘောင်ရွဲ့စောင်းလျက် မြန်မာပြည်၌ နိုင်ငံရေးလွတ်လပ်မှု မရှိကြောင်း ပြသနေသည့် ဖြစ်ရပ်များ၊ သူထောင်ကျစဉ် ဆယ်နှစ်ပြည့်နေ့က သီးသန့် (က)တိုက်ဆောင်မှ ၁၀နှစ်ပြည့်သူများအားလုံး လွတ်သွားကြပြီး သူ့ကျမှ ပုဒ်မ ၁၀(က)နှင့် ထပ်မံချုပ်ခံရသည့်ဖြစ်ရပ်များ၊ သည်တုန်းက သူ့ဇနီးသည် ဒေါ်ယဉ်ယဉ်လှ တစ်ယောက် ထောင်ဗူးဝမှာ ရှင်တို့ ကျွန်မယောက်ျားအပေါ်မှာ အငြိုးကြီးလှပါပေရဲ့ ဟုပြောဆိုကာ ကြူကြူပါအောင် ချုံးပွဲချငိုခဲ့ရသည့်ဖြစ်ရပ်များ၊ “ပွင့်ခက်နွယ်”၂၅ စက္ကန့် သို့မဟုတ် ၂၅နှစ်လူသားဆိုသလိုပင် ကိုအောင်မေသု၏ သက်တမ်းထက်ဝက်သည် ထောင်နန်းစံ နရသိန်နှစ်ကာလဖြစ်ခဲ့ရသည့်ဖြစ်ရပ်များစသည်၊ အို- များစွ၊ များစွ။”

(ကျဆုံးခြင်း (၁၀)နှစ်ပြည့် အထိမ်းအမှတ် စာအုပ်မှ ကောက်နုတ်ချက်)
http://news.mmsy.info/ 

မှကူးယူဖော်ပြပါသည်။