ဒေါက်တာ ထက်မြက်ထံသို့ အိတ်ဖွင့်ပေးစာ

ဂျူလိုင်ရဲရင့်

ဆိုရှယ်မီဒီယာတွင် ပြန့်နှံလျက်ရှိတဲ့ ဒေါက်တာထက်မြက်ဆိုသူရဲ့ စာ

ရက်စွဲ။ ။ ၂၀၁၂ ခုနှစ်၊ သြဂုတ်လ ၂၈ ရက်

ဒေါက်တာ ( ဦး ) ထက်မြက် ခင်ဗျား !

ကျွန်ုပ်သည် မြန်မာပြည်ကိုချစ်သော မြန်မာနိုင်ငံဖွား တိုင်းရင်းသားမုစ်လင်မ်တစ်ဦးဖြစ်သည်နှင့် အညီ လူကြီးမင်း၏ အတည်ပေါက် ရုပ်လုံးဖော်နေချက်အပေါ် မလိုလားအပ်သည့်အကျိုးဆက် မဖြစ်ပေါ်စေရေး အလို့ငှါ အိတ်ဖွင့်ပေးစာ တစ်စောင် ရေးသားလိုက်ပါသည်။

ပထမဦးစွာ မေတ္တာရပ်ခံလိုသည်မှာ ကျွန်ုပ်မှ လူကြီးမင်းအား စလာမ်ဆိုနှုတ်ခွန်းဆက်သမှု မပြုဘဲ ရေးသားခြင်းကို နားလည်ပေးပါရန်ဖြစ်သည်။ လူကြီးမင်းသည် အမှန်တကယ် အစ္စလာမ်သာသနာဝင် မုစ်လင်မ် တစ်ဦး ဟုတ်မဟုတ်ဟူသည် မသေချာ၍ဖြစ်ပါသည်။

ဒုတိယအချက်မှာ လူကြီးမင်းသည် အစ္စလာမ်သာသနာနှင့် အများမုစ်လင်မ်ထု၏ကောင်းကျိုးအား ကိုယ်စားပြုဆောင်ရွက်ကြောင်းမှန်ကန်ပါလျှင် အမည်ရင်း၊ မှတ်ပုံတင် (နိုင်ငံသားစိစစ်ရေးကဒ်ပြား) နံပါတ် နှင့် ကိုယ်စားပြုအုပ်စုတစ်ရပ်ရပ်ကို တိကျစွာဖော်ပြအပ်ပါသည်။ လူကြီးမင်းအနေဖြင့် တစ်သီးပုဂ္ဂလ လှုပ်ရှားနေပါ သည်ဟုဆိုလျှင်ပင် ရိုးသားပွင့်လင်းရန်အရေးကြီးပါသည်။ တောင်ကြီးမြို့မုစ်လင်မ်အသိုင်းအ၀ိုင်း၌ ဒေါက်တာ ထက်မြက်ဟူသောအမည်ဖြင့် ဆရာဝန်သော်လည်းကောင်း၊ ပါရဂူဘွဲ့ရပညာရှင်သော် လည်းကောင်း မရှိပါ။ လူကြီးမင်း၏ရေးသားချက်များမှာ အစ္စလာမ်ဘာသာရေးအဖွဲ့ကြီး၏သက်ဆိုင်ရာတာဝန်ရှိသူများထံအပြင် အခြား ဌာနများသို့တင်ပြထားသည့် စာအမျိုးအစားဖြစ်သည့်အတွက် ကလောင်အမည်/အမည်ဝှက် ကို အသုံးပြုရန် အကြောင်းမရှိသောကြောင့် လူကြီးမင်းသည် မည်သူမည်ဝါဖြစ်ခြင်း ကို မည်သူမျှ သိလိမ့်မည် မဟုတ်ပါ။

တတိယအချက်သည် လူကြီးမင်း၏နေရပ်လိပ်စာကိစ္စဖြစ်ပါသည်။ ကျွန်ုပ်သည် တောင်ကြီးသား စစ်စစ်ဖြစ်ပါသည်။ တောင်ကြီးမြို့ရှိ အိမ်နံပါတ်များကို ရပ်ကွက်ချင်းအလိုက် အိမ်ရာအရေအတွက်ပေါ်မူတည်၍ သတ်မှတ်ထားပါသည်။ အိမ်ခြေငါးရာအထိရှိသောရပ်ကွက်ဟူ၍ တောင်ကြီးမြို့၌ ယနေ့တိုင် မပေါ်ပေါက်သေး ပါ။ ထို့ကြောင့် လူကြီးမင်းဖော်ပြထားသည့် အိမ်အမှတ် ၇၈၆ ဟူသည်မှာ ရယ်စရာကြီးဖြစ်လို့နေပါသည်။ ကျွန်ုပ်တို့မြို့၌ စ၀်စံထွန်းလမ်းဟူသည် အမှန်ရှိနေသော်ငြား လူကြီးမင်းဖော်ပြထားသော ဗိုလ်ဗထူးရပ်ကွက် ဆိုသည်မှာ တောင်ကြီးမြို့ပေါ်ရှိ လေးဖက်သွားကလေးသူငယ်မှသည် ဆံဖြူသွားကျိုးတောင်ဝှေးကိုင်အရွယ်ထိ အဘယ်လူသားမှ မကြားစဖူးပါ။ ကျွန်ုပ်ထံတွင် တောင်ကြီးမြို့၏မြေပုံကားချပ်လည်း ရှိနေပါသည်။ လူကြီးမင်း ကိုယ်တိုင်ကိုယ်ကျ လာရောက်ကြည့်ရှုနိုင်ပါသည်။ သို့ဖြစ်ရာ လူကြီးမင်း၏အတည်ပေါက်ဖြီးလုံးက အလွန်ပင် မသေမသပ် ဖြစ်လွန်းလှပါကြောင်း အလွယ်တကူကောက်ချက်ချ သုံးသပ်ရပေသည်။

စတုတ္ထအချက်မှာ လူကြီးမင်းမှ ဖော်ကျူးသည့်အရေးကိစ္စကို လူစုလူဝေးဖြင့် ဆန္ဒထုတ်ဖော်ရန်( ဆန္ဒပြရန် ) အဆင့်ထိ မလိုအပ်ကြောင်း အသိဥာဏ်ပြည့်ဝသူတိုင်းမှ နားလည်ထားပြီးဖြစ်ပါသည်။ နိုင်ငံတော်မှ ကျွန်ုပ်တို့အား လွတ်လပ်စွာဆန္ဒထုတ်ဖော်ခွင့်ပေးထားသည်မှန်သော်ငြား ဆန္ဒထုတ်ဖော်တင်ပြနိုင်သည့်နည်းလမ်းများစွာရှိနေပါလျက်နှင့် ဤသို့ လျှပ်တစ်ပြက် အဆင့်ကျော်သွားခြင်း ၌ သွေးရိုးသားရိုးမှဟုတ်ပါလေစဟု သံသယ၀င်မိပါသည်ခင်ဗျား !

နောက်ဆုံးအချက်မှာ အကယ်၍ လူကြီးမင်းသည် မုစ်လင်မ် (အစ္စလာမ်သာသနာဝင်) တစ်ဦးမဟုတ်ပါက တကယ့် မုစ်လင်မ်ကဲ့သို့ ရေးပေါက်ရေးဟန်မျိုး ရေးသားနိုင်ခြင်း အပေါ် ချီးကျူးပါကြောင်း ပြောလိုပါသည်။ မုစ်လင်မ်ဟု အရေခြုံထားသူတစ်ဦး (၀ါ) တစ်စုတစ်ဖွဲ့၏လုပ်ဆောင်ချက်များနှင့် ပတ်သက်၍ ကျွန်ုပ်တို့မုစ်လင်မ်ပြည်သူ တစ်ဦး တစ်ယောက်မှာမှ တာဝန်မရှိပါကြောင်း လူကြီးမင်းအား သိစေအပ်ပါသည်။ အကယ်၍ လူကြီးမင်းသည် တကယ်စင်စစ် မုစ်လင်မ်တစ်ဦးဖြစ်နေပါကလည်း အစ္စလာမ့်တရားစစ်တရားမှန်အနက်မှ ဟုဒိုင်းဗီယဟ်စံနစ် ကို လုံးဝ နားမလည်သေးသူ သို့တည်းမဟုတ် တစ်စုံတစ်ရာသော ကိုယ်ကျိုးစီးပွားအတွက် သိသိကြီးနှင့်မိုက်လုံးကြီးလိုသူ အစွန်းရောက်ဝါဒီတစ်ဦးသာ ဖြစ်ကြောင်း ပေါ်လွင်နေပါသည်။ အဘယ်ကြောင့်ဆိုသော် လူကြီးမင်း၏လှုပ်ရှားမှုမှာ အစွန်းရောက် စည်းဝိုင်းတွင်းသို့ ခြေလှမ်း ကျွံဝင်နေသောကြောင့်ဖြစ်သည်။ အစွန်းရောက် အတွေးအခေါ်များ၊ လုပ်ရပ်များဖြင့် မည်သည့် ငြိမ်းချမ်းရေး နှင့် တိုးတက်ဖွံ့ဖြိုးရေးကိုမျှ မဖော်ဆောင်နိုင်ကြောင်း ကမ္ဘာ့သမိုင်းက သက်သေပြုနေပါသည်။ ဗုဒ္ဓဘာသာ၏အနှစ်သာရမှာ မေတ္တာတရား၊ အစ္စလာမ်သာသနာ၏အနှစ်သားမှာ ငြိမ်းချမ်းရေး၊ ခရစ်ယာန်ဝါဒ၏အချုပ်မှာ ခွင့်လွှတ်မှုဖြစ်ကြောင်း အသိ နှင့် သတိ လက်ကိုင်ပြုစေလိုပါသည် ( မှားယွင်းသည်ဟု ထင်မြင်လျှင် ပြင်ပေးနိုင်ပါသည်၊ ကျွန်ုပ် စိတ်မဆိုးပါ )။ တဖန် လူကြီးမင်း၏ရည်ရွယ်ချက် အထမြောက်ခဲ့ပါကလည်း ကျွန်ုပ်တို့ မုစ်လင်မ်အပေါင်းမှာ အသိဥာဏ်နိမ့်ကျသူများအဖြစ် လည်းကောင်း၊ အခွင့်အရေးသမားများအဖြစ် လည်းကောင်း၊ သွေးဆူ သွေးကြွလွယ်သူများအဖြစ်လည်းကောင်း မလွဲမသွေ တစ်ထစ်ချ မှတ်ချက်ပြုခံရနိုင်ပါသည်။ ဤသို့ဤနှယ် ဆိုင်းဘုတ်တပ်ခံရမည်ကို လူကြီးမင်းမှ လိုလားနေခြင်းလော ?

ဒေါက်တာထက်မြက် ခင်ဗျား !

ဆိုရေးရှိက ဆိုရပါတော့မည်။ ကျွန်ုပ်သည် ၁၉၈၇ ခုနှစ်၊ ငွေသိမ်းကိစ္စဆန္ဒပြမှုမှသည် ဆယ်နှစ်ဝန်းကျင် တစ်လျှောက် အရေးအခင်းများ၊ ဆန္ဒပြခြင်းများ စသည့် လှုပ်ရှားမျိုးစုံ၌ အတိုင်းအတာတစ်ရပ်အထိ ပါဝင်ဖူးသူဖြစ်ပါသည်။ (နိုင်ငံရေးကို အလျဉ်း ၀ါသနာမပါ၍ ဘေးထွက်ထိုင်နေသူတစ်ဦး ဖြစ်ပါသည်)။ သို့အတွက် မြွေမြွေချင်း ခြေမြင်ပါသည်။ သသနာ့အရေးနှင့် တိုက်ရိုက်ဆက်နွှယ်လာသဖြင့် ကျွန်ုပ်၏ကလောင် ရှေ့တစ်လှမ်းတိုးရခြင်း ဖြစ်ပါသည်။ ငြိမ်းချမ်းစွာ ဆန္ဒထုတ်ဖော်ပွဲဟု ဆိုသော်ငြား နောက်ဆက်တွဲဆိုးကျိုးများစွာ တန်းစီနေပါသည်။ ၄င်းပြင် တန်ပြန်ဆန္ဒထုတ်ဖော်ခြင်းများ လည်း အရံသင့်စောင့်ဆိုင်းနေကြမည်လားဟု အနိမ့်ဆုံးအားဖြင့် တွက်ဆမိပေသည်။ သို့သာမက လူကြီးမင်း၏ရည်ရွယ်မှု အထမြောက်စေရေးအတွက် ဤမျှလွယ်ကူလျင်မြန်စွာ ခွင့်ပြုခံရခြင်းမှာ ထူးခြားနေပါသည်။ ရုပ်သေးရုပ်ကို ကြိုးရှုပ်အောင် ကစားနေခြင်းလော ဟု ဆက်လက် အတွေးပွားစရာ ဖြစ်ရပါသည်။ တစ်ခါ ကျွန်ုပ်၏အတွေ့အကြုံအရ အပြင်းအထန် ဘေးတီးထိုးဆွတတ်သူအများစုမှာ တကယ်ဖြစ်လာချိန်ဝယ် ကုတင်အောက်ဝင်၍ Remote Control ကို နှိပ်နေတတ်သူများသာ ဖြစ်လေ့ရှိကြောင်း သိရှိထားပါသည်။ လူကြီးမင်းအနေနှင့် ကုတင်အောက်မှသတ္တိခဲလော၊ လူသိရှင်ကြားရှေ့ထွက်လာသူလော ဟူသည်ကို များမကြာမီ အဖြေပေါ်လာပါဦးမည်။ မည်သို့ပင်ဆိုစေကာမူ လူကြီးမင်းအဖို့ ချိန်ကိုက်ဗုံးတစ်ခုအဖြစ် ရမ်းရော်မှန်းဆထားခြင်းဖြစ်နိုင်ကောင်းသော်လည်း ကန့်လန့်ကာကြားမှ မလုံမလဲပြူထွက်လာသည့် ထူးခြားချက်အချို့ ကြောင့် ကျွန်ုပ်အပါအ၀င် မုစ်လင်မ်လောကအတွက် သတိပေးခေါင်းလောင်းသံမျှသာဖြစ်ပါကြောင်း သိစေအပ်ပါသည် ခင်ဗျား ! ဤအိတ်ဖွင့်ပေးစာအပေါ် ပြေလည်ကျေနပ်မှုမရှိပါက ကျွန်ုပ်နှင့် တိုက်ရိုက်ဆက်သွယ်ဆွေးနွေးနိုင်ပါသည်။

http://news.mmsy.info/

 

မှကူးယူဖော်ပြပါသည်။